Hae Anna.fi-sivustolta

Jo vain on turha

Viestiketju osiossa 'Ajankohtaista' , käynnistäjänä vierailija, 06.04.2020.

  1. vierailija Vierailija

    Empä mie juuri turhempaa ukkoa tiiä ku tuo, jolla on uuet linssit ja kehykset ko nuorela neitilä. Antais jo olla! Ei ossaa pittää väen puolta ollenkhaan ko antaa tuhota kaikki net tarvikheet, jokka on kriisissä tarpheen. Jo vain on turhake heti ykköslaatua ja varhmaan täksi vuueksi äänestethään semmoseksi. Vinkuu kruunuja koko ajan lissää, eikä sen takia riitä rahhaa ollenkhaan suojavälihneishiin. Eikä ees kruunua kanna pääshään ko puhhuu. On se kumma, että tuommosheen riittää varraa, vaikkei siittä ole äyrinkhään vertaa apua.
     
  2. vierailija Vierailija

    Ruottissa on yks kylä kaupan ja mitä kaikkea siihen kuuluuki. Vishiin tervheyskylpylät ja kaikki vesi otethaan kaltiosta vai mikä lie onki iso kaivo. Son vanha kylä, joka sopis vaikka laestitaateille tai semmosille muille aatheen lyömile, joila on rahhaa vaikka muile jakkaa. Ainoo paha ulkomaalaisile se, että joutus kolmen kruunun alle. Vishiin son vielä kaupan, vaikken mie halvaakhaan mainostaa mithään.


    Löyty linkki, joka on hyvä vinkki



    https://www.rc.se/bostader/obj28647_1652833994/
     
  3. vierailija Vierailija

    Mie olen miettiny kyllä pääni puhki jo pithkään että miksi niitä saihraanhoitajia piethään niin kaltoin ko tehhään. Hoitavat suomalaisia niilä seu'uilla jokka on aina puhuhneet suomea sielä pohjosessa, missä vähäsellä ruottin kielellä pärjää meänkielisten kans ihan helposti. Plöja on yksi sana mitä tarvithaan, ko hoiethaan ikäihmisiä rajan väärälä puolela.

    Net on patriootteja net saihraanhoitajat, ko net ei ole tulheet ees poikkinaiuksi niinko monet väylänvartiset tytönheitukat ovat tehneet. Luuhleet, että sielä se on hyvä ja tosiki se niin on, ko ajattelee, että eivät varrau'u mihinkhään. Pittää suojakampheet vain ottaa kotoa matkhaan, ettei sairastu. Se pättee sillonki, ku joutuu kahenkesken samhaan sänkhyyn, vaikkei semmosta varhmaan kovin ylheisesti tapahu.

    Ja se pättee niin miehhiin ko naishiin, että suojakampheet häätyy olla omasta takkaa. Sitä koskhaan tiiä niistä kaikista taueista, joita ihmisten keskuuessa liikkuu. Ja onhan sitä rakkauttakin niin kauhean monenlaista, että hirvittää. Niin se vishiin on!
     
  4. vierailija Vierailija

    On se kumma että tuo prinssi tanieliki suunnittelee potkupallon kautta jo nyt vaikka koronakriisi on vielä päälä. Valokuvassa pällistelee kahen muun ukon kans niinko koko tautia ei olis olemassakhaan. Meinaavat saaha ruottalaisten ottelut niinko samhaan muothiin ko mitä euroopassa on, vaikka eihän sitä tiiä, koska tästä eristyksestä luovuthaan. Sunkhaan koskhaan.



    https://www.expressen.se/sport/fotboll/allsvenskan/utspelet-gor-om-hela-allsvenska-sasongen/
     
  5. vierailija Vierailija

    No nyt se nähtiin. Sielä ei saa kulkea ko harva, jos nekhään ainakhaan kaikin päivin. Lihhaakhaan ei saa käyä hakemassa väärältä puolelta rajjaa, vaikka kruunu on heikkona niinko rajan oikeala puolela koronakin, joka vishiin on yhen sortin kruunu seki. Euhroon voipi luottaa ko sitä ei devalveerata koskhaan.

    Niin se käypi, että virkavalta se on lopulta paras saihraanhoitaja ko se toppaa viehraat rajale. Onneks ei tapa. Valkkosisaret hoivaavat vasta sitte ko joku on saanut wuhania keuhkhoihinsa. Ei sitä voi ennää hiihtoa slingan ympäri ko on syöny lepakonliemestä irti päässyttä virusta. On se synti seki!
     
  6. vierailija Vierailija

    Mullaki on pläntti yhessä saaressa mikä on naapurin puolela rajjaa. Kukhaan tartte ennää niitäkhään, ko heinää ei tehhä elukoile. Soma ajatella että silloin joskus sinne menthiin isoin joukoin ja niitethiin käsin viikatheela. Eikä tuppoakhaan saanu nakata tulheen ko keitethiin kahvia tai tehthiin ruokaa vaikka savua haluthiin karkottahmaan sääsket imemästä verta. Olis se ollu kauheata, jos net olis välittähneet tauteja.

    Se heinä se oli elukoitten ruokaa ja siksi sitä ei saanu nuotiohjoon heittää. Oli vähä niinko sillä lailla että sitte talvela ei ole voita kirnuttavaksi eikä maitoa litkittäväksi ees kissale, vaikka joka taloss oli kläppejä vaikka muille jakkaa. Oli niitä vanhojapiikoja ihan niinko vanhojapoikiaki, jokka eli tavalansa monesti yhessä naimattomina.

    Mie heistä muuta tiiä ko että aina joku oli äkäsenä vishiin ko ei ollu muile ilkeyttä jakkaa ko kläpeile. Vaikka olis kuinka haravoinu hyvin niin väitethiin että liikaa jääpi heinää jälkheen. Sitä tottu niin siihen että hyvvää jälkeä ei tehe koskhaan eikä sitte välittäny ennää puhheista mithään. Saatto joskus ilkeyttäki jättää tupon sinne tänne että puhheille oli perrää. Oli seki aikaa!
     
  7. vierailija Vierailija

    Nyppä mie hoksasin miks ennen olthiin tervheitä, ko haravoithiin ja niitethiin viikatheela, eikä kouhluun haettu pirssilä. Hiihethiin talvela ja juosthiin tai ajethiin pyörälä kesän aikhaan, eikä ruokaakhaan ollu nakkomiseksi asti. Kilot pysy kurissa yhtä helposti ko penskat sen jälkheen ko annethiin selkhään sillonki ko ei ollu mithään syytä.

    Yksiki otti kerran koko kolmen litran henttarin ja kittasi kurkhuunsa kaiken piimän. Muut olis jääny ilman, mutta tietenki sitä haethiin lissää. Sen jälkheen koltiaiselle ei tarjottu koskhaan ensin. Eppäilthiin, että tekkee samala laila. Itte en ollu sillon heinänteossa, mutta muut kerto.

    Havatten tulheeni raihnaseks vanhukseksi, ko en ossaa muistaa ko hyviä asioita, vaikka vähemän niitä oli ko ilkeitä. Jokku kylvi naatteja lehmile ja met koltiaiset söimä niitäki. Yhenki kerran heitimä kohta sen pääle, ko se tuli pyörälä mäkeä alas. Emmä havahneet, että oli lähteny perhään. Eipä se kyeny sauttahmaan, ko erkanethiin polulta kankhaale. Ei niitä kannate oikeasthaan ollenkhaan muistela.
     
  8. vierailija Vierailija

    Yhtheen maailmanvälhiin sitä ajatteli, ettei kenenkhään kannata jobata mithään maasta toisheen, mutta sitte tuli jäsenvaltioitten liitto, eikä kieltäny nuuskaa ruottalaisilta. Tiä häntä onko balteiltakhaan, ko sieltä kuulema tuovat nuuskaa, joka viepi tajun taihvaale ko siinä on nikotiinia enempi ku köyhilä svenskeilä. Se länsinaapurin ylähuulen turvottaja on terhveelisempi ko sätkä eikä ahista keuhkoja ollenkhaan, mutta siksi se vishiin kielethiinki. Pittäähän sitä lääkäreiläki olla töitä ja makkaraa leivän päälä.

    On sitä tullu ooteltua tätä uuttaki tautia jo kuukausia muttei se hättäile näile korpiseu'uille tulemista, mikä on vishiin hyvä asia. On sillä varhmaan semmonen kompassi kuitenki, että lopulta se istuu rapuila, eikä puhu tai haise milthään. Tiiä häntä ossaako tulla ovien läpi niinko koko kaupungin Vinski teki, muttei suinkhaan niin taitava ole sekhään. Näkymätön kuitenki niin mennee piihloon vaikka leipäpussin suuhun, mistä on helppo uia ihmisen niehluun.

    Nyt on vishiin taas rajoila vartioihneet niin, ettei nuuskaakhaan voi jobata väylän kautta koko maahan. On se julmaa semmonen niitä kohthaan, joitten sielu vaatii myrkkyä suuhun. Onneks ei itte tartte ainakhaan ennää, ko ikkää on kertyny yli tarpheen. Nuorena sitä pohti, että olenpa mie iso ko poltan ja näyttelen suurempaa ko olenkhaan. Vishiin kaikki jo senki havahneet, että viinaki on viisasten juoma ja sen takia sitä ei kannata suuhun pistää. Iän karttuessa sitä havahtuu siihenki, ettei sitä järkeä ole viihnaan tuhlattavaksi.
     
  9. vierailija Vierailija

    No se mie lähin kauphaan ostahmaan vitamiineja mutta pyörsin siittä ovelta ko sielä oli väkeä ko vilkkilässä kissoja jos ei enemänki ja sen takia en uskaltanu sisäle mennä. Sitä pelkää ihminen semmosta nirhaajaa jota ei näe vaikka ison kirjan luphauksiin kuinka luottas varsinki ku se on niin ilkeä että ensin viepi keuhkot pihale ja pittää saaha happea muuta kautta ko normaalisti. On kyllä semmonen klyyvari että luulis sen riittävän ilmanothoon.

    Häätyy käyä toisen kerran sitte ko sielä on vähemän väkeä vaikka iltasella ja kumma ko net kuvvaavat koko ajan pihhaa mutta eivät laita otoksia nethiin että tietäs koska sielä on enempi väkeä ko tarpheen. Varhmaan joku paragraafi taas estheenä sille että näytettäs kaikile koska on vähän väkeä ja koska paljon. Jos joku halvais ittelensä sen wuhaninviruksen niin menis sillon ko on enempi ihmisiä ja arkajalat ko on vähempi.

    Maaseu'ula sitä arvostettas ko näytettäis, ku kaikki halvaavat mennä yksin kauphaan eikä mökkihöperöitten sekhaan. Lähtehneet pakhoon uueltamaalta mutta hyvä seki ko tuovat rahhaa kauphoin ja muutenki ko terhveinä ovat muuttahneet järkiseu'uile. Saattavat pian kyllästyä kokohnaan vilihnään nyt ja ostaa autiotalot ittelensä ees johonki hinthaan. Sitä voipi nyt toivoa!
     
  10. vierailija Vierailija

    Sese siittäki tuli! Net suojakaupat meni mönkhään ko kiinalaiset petti hyvän pandamaihneensa ja suomalaiset sotki raha-asioita väärile tileile. Luulo, että olhaan jollaki laila niinko paremassa asemassa ko ruottalaiset oli seki harhaa, eikä nyt voia auttaa svenskejä muuton ko jakamalla net kehnot suojat niile. Eivät taia huolia jos eivät sitte ajattele, että antavat niitä lumelääkheeksi.

    Norjalaiset löivät rajat kiini ja sanoivat pelkäävänsä ruottalaisia, jokka puolesthaan eivät ymmärä että miksi maailman parhaimman strategian valinnutta pittää kauhistella. Ensin kuolee enempi mutta toisela kieroksela vähempi, eikä tartte niin pitkhään pittää talouen rathaita jumissa. Väki niin omaksunu ensisäännöt että ei usko ennää uusia joita se epitemilogi sannoo tarpheeliseksi. Syyttää nyt ihmisiä kurittomiksi.

    Aika sutki otus se ihminen on ko siksheen tullee. Miljardeja luvathaan, mutta eipä niitä väki näe muuton ko suurina numeroina lehissä, jos niitä nyt joku vielä tillaa. Onhan se soma käyä postilaatikolla kerran päivässä kattomassa, ettei se sota ole vielä puhjenu, vaikka koko ajan sillä pelotelhaan. Kälmi se ihminen silläki tavoin, että ossaa keinotela keinola jos toisela rahhaa omale tilile, vaikka kaikila muila on hätä. Vaikkei se ole mitenkhään toelinen sekhään niin kauan kuin meilä pyssyy maalaisjärki päässä, eikä aleta turhhaan panikoihmaan.
     
  11. vierailija Vierailija

    Jaa se oliki niipäin että ostethiin tietosesti kalhiimpaa ko halvempaa mikä on totta kai järkevää ko laatuhan se merkittee enempi ko hinta. Senhän piti olla kohalhaan vaikkei ollukhaan. Kaikki ei näköhjään ole talkoohenkisiä ko vaativat miljoonia siittä että ihmiset saavat suojia keuhkoilensa. Häätyy se kannattaa tuomonen ko Kiinasta ostethaan halvala ja sitte myyhän huoltovarmuuelle kalhiila. Saattaa se niinki olla että joku fiilaa linshiin.

    Sitä ko tavalinen ihminen tarttis joskus lantin kaksi, ei voia milhään ottaa rahhaa lainaksi misthään. Ja kaikesa pittää säästää ko se on ainoa konsti pärjätä nykyjhään ettei vain tule se kestävyysvaje häirittehmään niitä jokka halvaavat enempi noita maailman iloja. Se on sitte kaunis sana tuo kestävyysvaje eikä taia kukhaan keksinykhään koko ilmasua muuten ko pelastaksheen maan perikaolta. Taitaa seki helpottua nyt ko wuhanista saathiin pöpö lahjaksi.

    Vishiin ne keuhkokki menevät koko mustiksi heti ko wuhanvirus pääsee jylläähmään. Ei sitä kauheasti voi vaatia toisia elähmään sääntöjen mukhaan jos ei itte ole esimerkkinä. Yllykheistä paras on euro omhaan taskhuun missä se lämmittää sitte ko tullee tarpheen aika, mutta saattaa se niinki käyä ettei kukhaan luota ennää yhteenkhään tipan vertaa. Ja sillä laila sita taitaa ittele jo käynykki.
     
  12. vierailija Vierailija

    Tuo ei ollut kyllä milhään laila turha näky! Se oli albiino korppikotka, joka hymmyili kulthaishin hamphain sen tovin, minkä viipy taihvaalla. On komea elukka, eikä sitä ilhmeisesti kaikki ole koskhaan nähneet. Jo ehin arvella hulluksi tulheeni mutta sitte muistin että havukan konstakin löysi kummalisen linnun. Tiiättähän tet sen ajattelijan, joka löysi semmosen piilon että ytinpommikhaan ei olis sielä tappanu.

    Että miten saattaakhaan tuomonen yönmusta muuttua valkoseksi ja kultahamphaiseksi. Viisi viime kirjhainta varhmaan taas jollaki laila saahneet aikhaan tuomosen muutoksen, että naahraasta korpista tullee noin kammottavan fiini ko sitä tarkoin kattoo. Ja tuola korpila oli yhteyet mitä kauneimphaan uroksheen, joka oli tietenki pikkusen tummahko lepakko.

    Sieltä ylhäältä näkkee kauas ja niin korppi ko lepakkoki löysivät sammon, jota luulthiin kaohneeksi. Ei se ollut ko muuttunu näkymättömäksi ja hajuttomaksi eikä sitä kuullakhaan voinu muut ku tuo albiinokorppi ja tummahipiäinen lepakko. Net oli saahneet piihloon tietoja vuotavan sammakon, joka puhu muile puuta heinää. Kaikki lupas kiittää enkeleitä siittä ko löyethiin kauan kaoksissa ollu sampo ja sen jälkheen hiljenythiin oottahmaan että tämäki päivä loppus joskus. Virus jääpi silti henkhiin!
     
  13. vierailija Vierailija

    Se oli kyllä tosi ilkeän näkönen - se musta korppi ko se ei voinu milhään hyväksyä sitä ettei kyeny murtahmaan sitä valkosen korpin suosintaa vaikka luppaili ilmasen aterian tarjota. Melkhein halveeraa semmonen jokhaista suvereniteettia joka on luppautunut hoitahmaan nalleja lumipyrysessä maassa, eikä siittä olis koitunut ko harmia kaikile. Eihän sitä tasavaltaa voi milhään pittää hyvänä, ko tiiethään omasta kokemuksesta mihin se johtaa.

    Sen sijhaan kultasen korpin häikäisevä loisto on melkhein yhtä hurmaava ko kuninkhaitten jos ei komeampi ainaki sielä, missä taihvainen rauha avvautuu. Semmonen prameus innostaa väenkin tekehmään parhaansa sen etheen, että totelhaan sokeasti jokhaista päätöstä. Kaikki mennee paremin ko hyvin ko piethään hajurako toishiin eikä piitata talouen piosta ollenkhaan sillon ko pittää ymmärtää isompia asioita tärkeämäksi ko pieniä.

    Monikhaan ymmärä että sielä on jo robotit kau'ula kuvvaamassa ja mittaamassa sitä, onko joku kuuhmeessa vai ei. Ossaavat vishiin tunnistaa kasvokki kaikilta. On se kurjaa olla koko mustan korpin karttaja silti, ko se merkittee sitä että on vähä niinko itelle ilkeä. Hyväki se toishaalta on ettei piä itteä liian tärkeänä, vaan tyytyy omhaan oshaansa sillonki ko omaki terhveys on vaarassa toisia avittaessa niinko joilaki on.
     
  14. vierailija Vierailija

    Onhan se tietenki niinki - ko mie ajattelen, jos nyt yhthään ossaan sitäkhään tehhä. Tänhään on semmonen päivä että värjäthiin lankoja koreheiksi kaiken hiljasuuen keskelä. Enempi net oli naishelmoissa semmoset färit ko miesten vaatheissa mutta nykyjhään kaikki halvaavat olla albiinokorpin näkösiä sillä laila vielä ettei tiiä onko se narttu vai hurtta ko kumpiki ossaa kirroillaki samala laila. Niin son nykyjhään.

    Hienoa se on silkkivaatheissa käyä sillonki ko muut on sarkasissa pöksyissä tai puuvillasissa paioissa. Kyllä sitä pitkhään kattoo semmosta joka on ulospäin ko riikinkukko mikä vishiin viittaa jollaki laila ruottalaishiin ko net on sitä riikinväkeä. Aina net onki olheet hienompia ko met tavaliset tasavaltalaiset. Ittekki sitä sortuu sanohmaan että färit oli vaatheissa.

    Onkhaan semmosta olemassa ko riikinkana mutta jos ei ole mie uskon että on silti ko net ossaavat muuttua noitina albiinokorpeiksi ja vievät tietoa minne lie silkkitien vartheen juuri siihen paikhaan mistä se wuhaninviruski hoksathiin ensiksi. Mutta sitä mie en kyllä usko että kukhaan ees tutkis mishään laboratoriossa tuommosen pöpön olemassaoloa ko ei ihminen voi haluta semmosta tuhoa toisele ihmisele. Hyvvyys se aina voittaa ja jos ei muuala niin sitten naivin eläjän päässä tai länsinaapurissa.
     
  15. vierailija Vierailija

    Johan mie sanoin, että!

    Empä mie juuri turhempaa ukkoa tiiä ku tuo, jolla on uuet linssit ja kehykset ko nuorela neitilä. Antais jo olla! Ei ossaa pittää väen puolta ollenkhaan ko antaa tuhota kaikki net tarvikheet, jokka on kriisissä tarpheen. Jo vain on turhake heti ykköslaatua ja varhmaan täksi vuueksi äänestethään semmoseksi. Vinkuu kruunuja koko ajan lissää, eikä sen takia riitä rahhaa ollenkhaan suojavälihneishiin. Eikä ees kruunua kanna pääshään ko puhhuu. On se kumma, että tuommosheen riittää varraa, vaikkei siittä ole äyrinkhään vertaa apua.

    Meilä senthään on resitentti, joka tietää mistä niitä suojakampheita saahan vaikka silläki laila että piethään huoli nalleotuksista joitten takia ymmärrethään ylläpittää kylmiä suhteita piehneen tasavaltasheen maahan. Naapurissa ei ole resitenttiä, jolla olis vaikutusvaltaa päivänpolttahviin asioihin niin se ei saa suojavälineitkään ostetuksi. Kummanki miinukseksi häätyy tuumata kyvyttömyys ymmärtää panna taltheen kaikkea jo sillon, ko ei ole hätä. Vaikka eihän meilä ole pakko ollakhaan ko meilä on maassa resitentti.

    Hallitus ei taia ymmärtää että nyt ei voia muuta ko pittää saihraat erossa tervheistä ihmisistä jo suinki maholista. Auttakhaan nyt mikhään muu ko antaa resitentile oikheuet yksin määrätä koska rajoja auothaan tai annethaan lupa auvaista mökin ovi. Tietenki voihan määrätä että sapuskakauppojen sishäänkäynthiin häätyy ostaa kamera, joka mittaa jokhaisen lämmön ennen ko ulko-ovi avvautuu. Jos on kuumetta pyssyy kiini ja terävä-ääninen tuutti pakottaa perrääntyhmään ja muut voivat syrjätä jos eivät halvaa virusta niehluunsa. Jopa löyty keino!
     
  16. vierailija Vierailija

    Se mieki olen pruuvanu avittaa ihmisiä elähmään sillä laila, ettei wuhan tartu niehluun niinko maan resitenttiki on parhhaansa mukhaan tehny ja onnistunukki niin hyvin että svenskit ihhailevat häntä eiväkkä kuningasta juuri ollenkhaan saati sitten sitä epitemiolookia tai pääministeriä joka on tietenki samasta punapuolueehsta ko meiänkin kollega jolle jokku antavat jo kauheasti ruusuja samhaan taphaan ko Obamalle annethiin rauhanpalkinto heti ko se oli päässy valthaan. Luuhlaan että toimithaan fiksusti!


    Mie antasin risuja kummallekki pääministerille mutta erityisesti ruottalaisele ko se on ollu pitkhään vallassa niinko on kyllä meän resitenttiki eikä kumpikhaan ole osanu varrautua epitemhiaan milhään laila. Sothaan kylläki! Tavahlaan sottaa tämäki mutta erilaista siinä mielessä, ettei kenenkhään kannata olla niin höperö ko brittien pääministerei että lähtee heti eturintahmaan ja melkhein tapattaa ittensä. Osotti senkin että aina kannattaa suojata ittensä niin soan ko rauhan aikana, jos vihulainen on puskissa.

    Monikhaan tiiä että ainaki ylheisessä hyysikässä häätyy laittaa kansi kiini ennen ko huuhtelee jätökset matkhoihinsa. Net on justhiin nuo pikku pöpöt jokka ossaavat lennähtää ilhmaan, jos kansi on auki ko antaa veen hurista pönthöön. Kotonaki hyvä tapa niinko on käsien peseminenki, mitä kans kaikki suosittelevat eikä ole pahitheeksi pittää turvaväliä toishiin ihmishiin samhaan laihin ko eelä ajahviin authoin viishaat pitävät. Saattaa sitä silti saahan tauin tai ajjaa yhtheen ko vahinkojaki voipi sattua!
     
  17. vierailija Vierailija

    On se vähin dollareistaki kiini saahanko rokotetta ajoissa vaiko ei sillä yksi tutkija ja tohtorismies haki jo vuona 2016 rahotusta ihmiskokheitten tekemisheen semmosele lääkheele joka olis tepsiny koronavirusten kuolettavhiin muothoin. Kapitalishmiin uskovat lääkefirmat ei halvaa panna suuria summia semmosheen mistä ei ole ollenkhaan varmuutta saaha lisäarvoa jossaki vaiheessa.

    Se oli se ebolaepitemiaki läntisessä Afrikassa ja silloin norjalaiset alko kyllä julkisen puolen ja yksityisen kans yhteistyön perustamalla säätiön mutta ei siihenkhään ole tullu tarpheeksi dollareita vaan enempi tarvittais. Jo nyt pystyvät yhessä tutkimuskeskuksessa käyttähmään hiiriä testeissä mutta sekhään ei ole ihan sormet näpsäyttämälä mahollista.

    Ei ainakhaan semmosia sopimuksia piä tehä, että rokotheen myyjälä ei ole mithään vastuuta sivuvaikutuksista, ko sillon on melkhein tae siittä ettei rokotetta ole testattu tarpheeksi. Toishaalta olis mukava ko ei tarttis kenenkhään ennää pelätä wuhanvirusta ja eristäytyä kokohnaan kothiin tai mökile.
     
  18. vierailija Vierailija

    Emmie kyllä tiiä kauanko tämmöstä erakoitumista jaksaa ko ei oikhein voi mishään käyä. Varhmaan jokku taiteilijat loihtivat nyt komheita kuvatuksia muistoiksi näistä hetkistä ku moni eli evakossa yksihnään ja moni makkaili vuotheen pohjala puhti poissa vishiin samhaan aikhaan ko eliithiin lukkeutuvat lommailivat merien rannoilla. Ruottissa oli jotaki kirjotuksia niistäki mikä varhmaan on mukavaa tietoa semmosille, jokka surevat poismenheitä sukulaisia. Sielä on eriksheen positiivisia juttuja kaiken kaameuen keskelä.

    Tosi se vain niinki on että jouhkaisia on jo tullu maisehmiin ja komheita net on ko lentävät ilmojen halki. On se kumma että on pääsheet yli uuenmaan rajan ko sielä piethään huolta siitä, ettei kukhaan kulje mithään reittiä pitkin turvhaan. Niin se vain kävi että heti ko ukkelit jättivät uppoavan laivan niin saathiin tiukka vartiointi, mikä on kovin tuttua varhmaan monile jo kotiajoilta. Ruottissa urospuoliset vielä yrittävät pittää vappauesta huolta mutta arvaanpa että kohta alkaa sieläki feministinen komento muutenki ko puhheissa.

    Ei sielä kaikki miehet lähe leikhiin mukhaan vaan kokkoontuvat omhiin pyhäthöihin niinko ennenki eiväkkä päästä helmaväkeä ollenkhaan sisimphään renkhaaseen. Suomessaki nuorimat on jo kyllästyhneet elähmään yksihnään mutta väärin se tietenki on laumoittua isoksi joukoksi viettähmään aikaa. Vaphaus on mukava asia mutta eipä se sekhään ole hauska jos sitä on liikaa sillä viruksella sillon ko itte joutuu vuotheen omaksi letkhuin. Kannattaa teinienki varoa!
     
  19. vierailija Vierailija

    Emmie kohta uskala lukea ollenkhaan noita THL:n ehotuksia ko ne muuttuvat tiuhemphaan ko heimoväelä ennen vanhaan hevonen. Ensin se pääjohtaja Markku Tervahauta pärski ja näytti, ettei muuta ko yhtheen räkäliihnaan monta kertaa. Sitte sano ettei niistä hengityssuojista ole ko haittaa, mutta ny se tuumaa mainostelevisiole että oihreettomakki voivat olla kantajia. Siinä luki että suurela määrälä vielä, mikä tarkottaa vishiin sitä, että semmosia oihreettomia ihmisiä on monta.

    Sitten hän tuumii, että koronavirus opettaa koko ajan uusia asioita. Ja toistaa saman toisin sanoin ko tuumaa, että oireettomien infektoituneiden määrä on todennäköisesti hyvin runsas. -Silloin ei itsekään tiedä olevansa tartuttava, Tervahauta sano. Sen jälkheen lissää: -Silloin ei itsekään tiedä olevansa tartuttava. Vishiin puhhuu ihmisistä! Sannoo olevansa kansankielinen, vaikkei mishään nimessä ole.

    No sen jälkheen tuumaa, että suu- ja nenäsuojuksen käyttö voi vähentää taudin tarttumisen riskiä ja suosittaa itsetehtyä kankaista maskia, koska teollisesti valmistetuista on pulaa. Työterveyslaitoksen sivuilta löytyy ohjeet. Materiaali pitää olla hyvää ja joka käytön jälkeen se tulee pestä. Eikä puhu mithään siittä että pitäs olla koskettamatta kasvoja ja sitte pessä käet heti sen jälkheen ko viepi maskin pesukonheesheen.
     
  20. vierailija Vierailija

    Mie luin jotaki semmosta että amerikkalaiset eivät halvaa enää rahottaa WHO:n eli maailman tervheysjärjestön toimia, enkä ihmettele yhthään sitäkhään. USA on vishiin suurin maksaja mutta kiinalaiset ovat vallottahneet koko järjestön oman tukijansa avulla. Aluksi se johtaja aliarvioitti koko pandemian mutta sitte tuli järkhiinsä myöhemin ko se oli jo globaali ongelma. Eli maailmanlaajunen mutta käytin tuomosta hienoa sannaa ko olen sen jostaki oppinu.

    Mulla on semmonen kutina että se Trumppi halvaa toiselekin kauele resitentiksi niinko net kaikki tekevät eikä se ole helppoa jos on suhtautunu oma-aloitheisesti vähätellen viruksheen. Pittää löytää syntipukki ja siihen se Tedros Adhanom Ghebreyesus soppii ko valettu ko se tiiethään, että kipusi pallilheen kiinalaisten avula. Eikä se kyllä ole hyvin hoitanukhaan hommiansa ko koko maailman on tämmösen tauin kourissa. Vaikea se on ennää estää ko ei toimi ennenko pissat on pöksyissä!
     
  21. vierailija Vierailija

    Trumpin mukhaan kysymys on kiinaviruksesta, jos Expressenin pääkirjoituksen rustannutta Linda Jerneckia on uskominen. Ja kiinalaiset väitti kivenkovhaan että ei se tartu ihmisestä toisheen vaikka taiwanilaiset kertoivat jo viime vuen puolela toisin. Aika suuri dollariläjä myönnetty amerikoista ku peräti 400 miljoonaa on annettu. Tämä Jerneck pohtii, onko Trumpin veto loistava vaiko katastroofi, mutta tietenki voipi olla neuvottelutekniikkaki. On piian hyväki semmonen!
     
  22. vierailija Vierailija

    Ai jaa, vai niin! Että silleen! Jo saapi tulla ja mennä uueltamaalta koko Suohmeen niinko halvaa, eikä kukhaan sakota tai estä kethään kurvaamasta maaseun kauphoin tekehmään ostoksia. Paikaliset ikäihmiset vilkuilevat kiilusilmin tulokhaita, jokka on oman maan asukhaita. Pienilä kylilä tietävät kuka on mistäki mutta kaupappa onki jo kirkonkylilä, eikä sielä tiiä kaikkien asuinpaikkaa. Joku voipi olla viruslinko ja joku ei, mutta kaikkia pittää pelätä.

    Mummokki on ihan sekasi ny ko net kuuli että kahtheen vuotheen ei saa nähhä jälkipolvia ko pittää ellää eristyksissä niin kauan jos ei pitemphään mikäli mielii pysyä erossa wuhanviruksesta. Tietenki ikävää seki jos joku ellää evakossa mutta joku tullee ja tuopi itte tietämättä tauin ja sitte toinen menehtyy siihen jälkikätheen. Jos on jälkipolvea, saapi perinnön palkaksi, vaikkei olis ollut ees tarkotus. Varhmaan huhuja alkaa tommosestaki liikkua.

    Ruottin rajala ne pelkäävät suomensukusia rajan väärältä puolelta sitäki enemän, mutta sieläki saattaa kääntyä päinvastoin sitte ko naapurit on saahneet laumaimmuniteetin. Vaikkei siittä ole mithään varmuutta ko ei ole vielä ehitty tutkia kuinka wuhanvirus käyttäytyy. Jokku väittävät että voipi uusia jo vuuen jälkeen toisen kerran ja jokku että siihen tullee immuuni. Mitä sitä puhuhmaan jos ei tiietä!!
     
  23. vierailija Vierailija

    Suomessa on wuhanviruksheen kuollu 75 ihmistä ja heistä 59 on elänyt loppuaikhaansa vanhusten hoivakoeissa kahela eri paikkakunnala. Eihän siinä jää ko 16 muualle ku hoivakothein. On rosenttisesti hurja ero mutta minkäpä sille ennää mahtaa. Olis pitäny pittää tarkempi vaari iäkhäistä näin äkkiä päätellen. Saapi nähä miten nyt käypi, ko kaikila on oikheus taas kupata missä halvaa ko ei yli kymmenen laumana tehe niin.

    Mailman tervheysjärjestöki sai rahhaa 150 miljoonaa dollaria lissää ko Gates alko tukea sitä enempi sen takia ko maan resitentti jääytti amerikkalaisten myöntämät huikeat summat. Mitä lie se 400 miljoonaa dollaria euroina tällä hetkelä, mutta ei suinkaan ihan juuri yhtä paljon ku sen sijhaan Suomen luppaama kaksi miljoonaa on dollareina vähä enempi. Jotenki tuntuu silti että on ku hyttysen kakka meriveessä mutta tietenki silläki jotaki saapi.

    Onkhan sillä Gatesillä dollareita vielä patjan alla enempi ko monela pienelä maala ko sillä laila mie eppäilen asian laian olevan. Sanothaan että jos syntyy Suohmeen saapi lottovoiton mutta näköhjään jokku saavat vähä enempi ko syntyvät amerikhoin. USA:n resitentti voipi nyt tuumata että miepä voinki auttaa oman maan väkeä ko Gates antaa maailmale. Saapi enempi ääniä taas omhaan laahriin ko sen hoksaa tehhä!
     
  24. vierailija Vierailija

    On se vain raha ketun kainalossa melkonen yllyke sillon ko sitä jaethaan yhteisestä lompsasta yksityisile, jokka halvaavat saaha vähälä vaivala enempi tuohta kupatuksi. Aina se on tiietty että kauppa se on joka kannattaa eikä mikhään ole kielletty jos oikhein ossaa tehä ilman että rikkoo yhthään paragraafia. Saapi myyä siihen hinthaan mikä sovithaan ja allekirjotethaan papehriin vastuullisten kanssa eikä tartte pelkhään sanhaan luottaa niinko tehhään tietenki sitte jos kumppanukset halvaavat salata diilit muilta.

    Häätyy kyllä tuumata että sitä lukkee metiaaki ihan eri laila ko tietää kuka missäki maassa hommailee yhteisiä hankheita toisilta piilossa. Moniki vanha pamppu alkaa jonku rikhaan maan puudeliksi varsinki jos omasta valtiosta ei löy'y yhtä hyvvää rahapuuta. Semmosia on sitten mahottoman paljon vaikkei sitä kaikki usko. Nykki puolustavat semmosia suu suurena jokka on saahneet kaiken alkhuun vaikka pitäs tuomita. Eiväkkä ole silti mithään vakkoilijoita niinko jokku saattais ajatella.

    Tietenki kaikila on sananvappaus puhua mitä sylki suuhun tuopi ko ei julkisesti loukkaa kethään ilman perustheita mutta väärin on vaientaa tavallisia pohtijoita pelkästhään arvovallan avula. Kaikila ei tietenkhään ole ollenkhaan muuta tekemistäkhään ko nälviä poliittisin perusthein muita ääri-ihmisiksi vaikka jokhainen voipi havaita etteivät väitheet ole ku herjoja. Köyhälä sitä ei ole muuta ommaisuutta ku kurjuus eikä kukhaan halvaa sitä ilmaseksikhaan omale kohalensa.
     

Tilaa Annan uutiskirje!

Annan uutiskirje tuo sähköpostiisi uusimmat artikkelit, testit ja kilpailut.

Kaikki kentät ovat pakollisia
Luonnos tallennettu Luonnos poistettu

Jaa tämä sivu

Alibi
Anna
Deko
Dome
Erä
Hymy
Kaksplus
Kippari
Kotilääkäri
Kotiliesi
Koululainen
Ruoka.fi
Parnasso
Seura
Suomen Kuvalehti
TM Rakennusmaailma
Tekniikan Maailma
Vauhdin Maailma
Golfpiste
Vene
Nettiauto
Ampparit
Plaza
Muropaketti